லடாக்கின் பனிப்படர்ந்த சிகரங்களில் கடந்த நான்கு ஆண்டுகளாக நிலவி வந்த பதற்றம், இன்று இந்தியாவின் இமாலய வெற்றியுடன் முடிவுக்கு வர தொடங்கியுள்ளது. 2020 கல்வான் மோதலுக்குப் பிறகு, ஆசியாவின் இரு பெரும் சக்திகளுக்கு இடையே நிலவிய அந்த நிழல் யுத்தத்தில், பாரதம் தனது அசைக்க முடியாத உறுதியை உலகிற்குப் பறைசாற்றியுள்ளது. டெப்சாங் சமவெளி முதல் டெம்சோக் வரை, இன்று 1,000 சதுர கி.மீ. பரப்பளவில் இந்தியா தனது முழுமையான ரோந்து உரிமையை மீட்டெடுத்துள்ளது.இது வெறும் இராணுவ நகர்வு மட்டுமல்ல; இது நவீன இந்தியாவின் 'ராஜதந்திரப் போர்' முறைக்குக் கிடைத்த மகுடம்!
பனிமலையில் ஒரு பராக்கிரமம் உலகின் மிக உயரமான போர்க்களத்தில், சுவாசிக்கக் காற்றே அரிதாக இருக்கும் சூழலில், சீனப் படைகளுக்குச் சமமாக இந்திய வீரர்கள் நிலைநிறுத்தப்பட்டனர். "எல்லைப் பாதுகாப்பு என்பது சமரசத்திற்கு அப்பாற்பட்டது" என்ற பிரதமர் மோடியின் தீர்க்கமான முடிவுக்கு வலுசேர்க்கும் வகையில், இந்திய இராணுவம் இமயமலையின் உச்சியில் இரும்பு அரணாக நின்றது. சீனா எத்தனையோ முறை ஆதிக்கம் செலுத்த முயன்றபோதும், இந்திய வீரர்களின் வீரமும், நவீன ஆயுதங்களின் பலமும் அவர்களை ஒரு அடி கூட முன்னேற விடவில்லை.
ஒரு காலத்தில் எல்லையில் சாலை வசதிகள் குறைவாக இருந்த நிலை மாறி, இன்று இமயத்தின் சிகரங்களை இணைக்கும் வகையில் அதிநவீனப் பாலங்களும், உலகத்தரம் வாய்ந்த சுரங்கப்பாதைகளும் போர்க்கால அடிப்படையில் கட்டி முடிக்கப்பட்டுள்ளன. அடல் சுரங்கப்பாதை (Atal Tunnel) போன்ற வியூக முக்கியத்துவம் வாய்ந்த கட்டமைப்புகள், எத்தகைய மோசமான வானிலையிலும் இந்திய இராணுவத் தளவாடங்களை நொடிப் பொழுதில் எல்லைக்குக் கொண்டு சேர்க்கும் வலிமையை வழங்கியுள்ளன.மேலும் சீனாவின் ஊடுருவல் முயற்சி முறியடிக்கப்பட்டதற்கு, எல்லையில் இந்தியா மேற்கொண்ட இந்த அசுரவேகக் கட்டமைப்புப் பணிகளே மிக முக்கியக் காரணம். "சாலைகள் தான் ஒரு நாட்டின் நரம்புகள்" என்பதை உணர்ந்து, எல்லையோரம் கிராமங்கள் வரை இன்று நவீன வசதிகள் சென்றடைந்துள்ளன.
அதுமட்டுமில்லாமல் பொருளாதாரப் போரும் சர்வதேச அழுத்தமும் இந்த வெற்றிக்குக் களம் அமைத்துக் கொடுத்தது இந்தியாவின் பலமுனைத் தாக்குதல்கள். எல்லையில் துப்பாக்கிகள் கர்ஜிப்பதற்கு முன்னரே, டெல்லியின் அதிகார மையங்கள் சீனாவின் பொருளாதாரத் தளவாடங்கள் மீது தாக்குதலைத் தொடங்கின. சீனச் செயலிகள் முடக்கம், வர்த்தகக் கட்டுப்பாடுகள் என இந்தியா எடுத்த அதிரடி முடிவுகள், டிராகனின் பொருளாதாரப் பசிக்கு முட்டுக்கட்டை போட்டன. அதே சமயம், உலக அரங்கில் அமெரிக்கா முதல் ஜப்பான் வரை உள்ள நட்பு நாடுகளை ஒன்றிணைத்து, சீனாவுக்கு எதிரான ஒரு தார்மீகக் கூட்டணியை இந்தியா மிக லாவகமாக உருவாக்கியது. இது ஒரு "டிப்ளமேட்டிக் மாஸ்டர் ஸ்ட்ரோக்" என இன்று உலக நாடுகளால் வியந்து பார்க்கப்படுகிறது.
விழிப்புடன் கூடிய வெற்றிப் பயணம் இன்று டெப்சாங் மற்றும் டெம்சோக் பகுதிகளில் இந்திய வீரர்கள் மீண்டும் தங்களது பழைய ரோந்து உரிமையைப் பெற்றுள்ளனர். இதன் மூலம் இந்தியாவின் பாதுகாப்பிற்கு மிக முக்கியமாகக் கருதப்படும் சியாச்சின் மற்றும் கராகோரம் கணவாய் பகுதிகளுக்கு இருந்த அச்சுறுத்தல் நீங்கியுள்ளது. ஆனால், இந்த வெற்றி வெறும் கொண்டாட்டத்தோடு முடிந்துவிடப் போவதில்லை
"அமைதி வேண்டும், ஆனால் அது இந்தியாவின் கௌரவத்தைச் சிதைத்து வருவதாக இருக்கக்கூடாது" என்பதில் மோடி அரசு காட்டிய உறுதி இன்று பலன் தந்துள்ளது. சீனா தனது படைகளைத் திரும்பப் பெற்றுக்கொண்டாலும், பாரதத்தின் விழிப்புக் கண்கள் இமயத்தின் உச்சியில் எப்போதும் நிலைத்திருக்கும். இது புதிய இந்தியாவின் காலம்; இங்கே வலிமை மட்டுமே அமைதிக்கான வழி என்பதை உலகுக்கு இந்தியா நிரூபித்துவிட்டது.
